- 672 -

1440. Juli 26. Neisse.

Wir Conrad von gotis gnaden bischoff zu Breslaw, von dem allirdurchluchtigsten hern Albrechten seliges gedechtniss etwan Romischen, zu Hungern etc. vnd czu Behömen kunig, czwuschen vnd (?) den nachgeschrebin teilen gesaczter vnd gebener richter, als das seiner gnaden commissionbrieff vns geantwortet eygentlicher vnd sonderlicher ausweises, bekennen offintlich mit desim briue allen den, die en sehen adir horen lesen, alse denne die von Prostancz vff vnsere verbottunge, die von Legnicz vor vns als irem richtere von kuniglicher macht von Behemen gegebin, in irer anclage beschuldigen, wie sie en xxxi tonnen herings vnd eylf tonnen halbfisch, xiiii pferd, dreye wagin, ix schok gr. vnd einen firdung vnd dorczu vier armbrost hetten genomen als zerunge wegin etc, doruff die von Legnicz vor irer antwort begern ire gewere nach rechtis weise zutun, doruff sprechen wir Conrad bischoff vnd richter vorgenant das die von Prostancz den von Legnicz die gewere tun vnd loben sullen mit hand vnd mit munde voreyden in irer macht vnd anderer, die sie brocht habin; forder als die von Prostancz in irer schulde zu den von Legnicz setczin vnd sie beschuldigen, das die von Legnicz en habin nachdrabin lossin vnd ir gut nemen etc. als das ire clage inheldet vnd auch schaden vnd czerunge doruff flahen (?) vnd wirdigen, doruff vnd vff alle vnd igliche schulde vnd stocke antwortet Ambrosius Bitschin in macht der von Legnicz, als er, des vor vns sein machtbrieff gelegit hat, das en dorumme nicht wissentlich sey nach des en auch nicht gesteen, doruff sprechen wir Conrad bischoff vnd richter vorgeschreben, torren die von Legnicz in macht der stad durch iren.. borgermeister mit czweyen ratmannen sich mit irem eyde vff die heilgen abnemen als recht ist, das sie des nicht getoen habin vnd des vnschuldig sind, domete entledigen sich die von Legnicz von rechtis wegin vnd wenne sie sich also der houptsachen entledigen, so sind sie des ingeleen schadens vnd czerunge auch nicht pflichtig zurichten von rechtis wegin, des zu orkunde habin wir vnser sigel vff desin brieff drucken lossin. Gebin zur Neisse am dinstage nach Jacobi des grosten heilgen czwelfboten, nach gotis gebort tusundvierhundert dornoch im XLten jore.

Orig. Kgl. Bibl. z. Berl. Ms. Boruss. f. 567. No. 66 mit aufgepresstem Siegel.

Urkunden-Buch der Stadt Liegnitz und ihres Weichbildes bis zum Jahre 1455 - Herausgegeben dr Friedrich Wilhelm Schirrmacher - Liegnitz 1866